XALQ  Xezerxeber.az-a istinadən xəbər verir ki, Sabunçu rayonu, Bakıxanov qəsəbəsi, Yavər Əliyev küçəsində yerləşən ”Akkord” yaşayış kompleksi kimi tanınan ”Uğur 2” kompleksinin bəzi sakinləri belə iddia edirlər.

Onlar yaşadıqları binadakı idarəetmədən narazıdırlar.

Sakinlər deyirlər ki, illərdir aylıq olaraq komendant vasitəsilə kommunal ödənişlərini edirlər. Amma iddiaya görə, bu pullar bir çox hallarda binanın saxlanmasına deyil, onlara bəlli olmayan istiqamətlərə yönəldilir. Ən ciddi problem isə gündəlik istifadədə olan liftlərin vəziyyətidir.

Sakinlər liftlərlə yanaşı, kompleksin ərazisində vəziyyətin ürəkaçan olmadığını deyirlər. Həyətdəki oturacaqlar sınıq, asfalt örtüyü bərbad haldadır.

Sakinlər bildirir ki, binanın ümumi xərcləri üçün toplanan pulların şəffaflığı təmin olunmur. Buna görə də komendant pulunu bəziləri ödəməkdən imtina edib. İndi sakinlərin əsas tələbi yeni komendantın sakinlərin iştirakı ilə və qanunvericiliyə uyğun seçilməsidir.

Sakinlərin şikayətini dinlədikdən sonra məsələni ”Uğur 2” yaşayış kompleksinin komendantı Anar Məmmədova ünvanlamaq istədik. Ofisə getdik, amma yerində deyildi. Telefonla əlaqə saxlayan zaman isə o bəzi hallarda sakinlərin liftdən istifadəsini məhdudlaşdırdığını etiraf etdi. Bildirdi ki, şikayət edənlərin əksəriyyəti ödəniş etməyən sakinlərdir.

Anar Məmmədov onu da qeyd etdi ki, toplanan pulların hansı istiqamət üzrə xərcləndiyinin hesabatını verə bilər.