“Prezident İlham Əliyev “Əl-Ərəbiyyə” telekanalına müsahibəsində bir çox vacib məqamlara toxundu. İlk növbədə Azərbaycan-Ermənistan münasibətlərinin normallaşması ilə bağlı rəsmi İrəvanın öhdəliklərini xatırlatdı. Bildirdi ki, Ermənistan razılaşmanı pozarsa, bu ölkə ciddi çətinliklərlə üzləşəcək. Belə ki, Ermənistan mütləq bölgədəki güc balansı haqqında düşünməli, Azərbaycana qarşı heç bir halda ərazi bütövlüyü iddiası ilə çıxış etməməlidir. Yəni, Ermənistanda hər kəs anlamalıdır ki, Vaşinqton razılaşması şəxslər arasında yox, 2 dövlət arasında imzalanan sənəddir. Ona görə məsələyə ciddi yanaşılmalıdır. Hesab edirəm ki, Ermənistan cənab Prezidentin bu xəbərdarlığından nəticə çıxarmalıdır”.

Bu açıqlamasında Milli Məclisin deputatı Könül Nurullayeva deyib.

Onun sözlərinə görə, Ermənistan hakimiyyəti heç bir halda regiondakı güc balansını gözardı edə bilməz:

“Müsahibədə dövlət başçımız bir daha bəyan etdi ki, Vaşinqton razılaşması Azərbaycanın milli maraqlarına tam cavab verır. “Vaşinqtonda paraflanmış sənəd Ermənistan–Azərbaycan münasibətlərinin dövlətlərarası çərçivədə necə qurulmalı olduğu barədə Azərbaycanın baxışına əsaslanır.” Bu, sözügedən razılaşma ətrafında mənfi rəy yaratmaq istəyən daxildəki bəzi qərəzli dairələrin iddialarının həqiqəti əks etdirməyini təsdiqləyir. Bir daha aydın olur ki, bəzi üzdəniraq qüvvələr Azərbaycanın uğurlarını həzm edə bilmir. Amma əslində reallıq bundan ibarətdir ki, Azərbaycan Prezidentinin atdığı bütün addımlar, verdiyi bütün qərarlar hər zaman dövlətimizin milli maraqlarını özündə əks etdirir”.

Millət vəkili bildirib ki, münaqişənin 30 ilə yaxın müddətə uzanmasının səbəbi də Azərbaycanın heç vaxt təslimçi sülhlə barışmaması olub:

“Bu baxımdan dövlətçilik maraqlarını öz korporotiv maraqlarından üstün tutan qaragüruhların Azərbaycanla Ermənistan arasında paraflanmış sənəd ətrafında şou yaratmaq cəhdləri iflasa uğrayır. Azərbaycan Prezidenti Zəngəzur dəhlizi -TRİPP marşrutu ilə bağlı məsələyə də aydınlıq gətirdi. Bildirdi ki, əslində 5 il ərzində dəhlizin işə düşməsi mümkün ola bilərdi, lakin Ermənistanın məsələni yubatması ABŞ Prezidenti Donald Trampın və onun komanndasının prosesə qoşulmasına zəmin yaratdı. Beləliklə, layihə beynəlxalq təhlükəsizlik zəmanətləri əsasında reallaşacaq. Bu da Azərbaycanın maraqlarına tam cavab verir. TRİPP Asiyanı Avropaya Azərbaycanın ərazisindən birləşdirən yeganə yola alternativ yaradacaq. Ermənistan isə nəhayət, tranzit imkanından yararlanacaq.

Cənab Prezident Rusiya ilə münasibətlərə də aydınlıq gətirdi. Bəyan etdi ki, münasibətlərin korlanmasına görə məsuliyyət bizim üzərimizə düşmür. Mülki təyyarənin vuurlması, 2 azərbaycanlının qətlə yetirilməsi – bunlar Azərbaycan cəmiyyətində haqlı olaraq qəzəbə səbəb olub. Təbii ki, Azərbaycan heç bir halda bizə qarşı təcavüz əlamətlərinə və təzahürlərinə, yaxud hörmətsizliyə dözməyəcək. Bu səbəbdən münasibətlərin normallaşması Rusiyanın davranışlarından asılı olacaq”.