Əhalini “Coca-Cola”, “Fanta” və müxtəlif adlarda satılan bütün marka çipsilərdən uzaq olmağa çağırıram.

Bu kimi məhsullardan birdəfəlik imtina edin, yeməyin, böyüməkdə olan övladlarınıza da yedirməyin.

XALQ.AZ məlumat verir ki, bunu Tribunainfo.az-a Azad İstehlakçılar İctimai Birliyinin sədri Eyyub Hüseynov deyib. O bildirib ki, hazırda Azərbaycanda satışda olan heç bir çipsi qətiyyən keyfiyyətli deyil:

“Hansısa marka çipsi daha keyfiyyətlidi demək mümkün deyil. Çünki heç biri keyfiyyətli deyil. Birdəfəlik qəbul edin, bu məhsullar insan orqanizmi üçün zərərlidir. Qida Təhlükəsizliyi Agentliyi malların təhlükəsizliyini yoxlayır, təmin edir. Lakin keyfiyyətlə bağlı məsələ qalıb masa üzərində. Bununla heç kəs məşğul olmur. Ölkə bazarında arzuolunmaz xeyli sayda məhsul var.

“Lays” çipsiləri ilə bağlı sonuncu yayılan məlumatı xatırlayırsınız. Bir partiya malın təhlükəli olduğu məlum oldu və geri çağırıldı. Bildirildi ki, həmin pariya maldan Azərbaycana gətirilməyib. Ona görə də marketlərdən yğışdırılmadı və hələ də satılır. Ancaq heç kəs deyə bilməz ki, həmin markanın digər məhsulları keyfiyyətlidir.
Ümumiyyətlə, əhaliyə səslənirəm ki, “Coca-Cola”, “Fanta”, çipslərdən və bu kimi bütün mallardan uzan olsunlar”.