Azərbaycan Respublikasının Prezidenti İlham Əliyevin ərəb dünyasının nüfuzlu informasiya resurslarından biri olan “Əl-Ərəbiyyə” telekanalına verdiyi müsahibə ölkəmizin xarici siyasət prioritetlərinin, regional və qlobal proseslərə baxışının nümayişi baxımından mühüm hadisə oldu. Bu müsahibə, həm də Azərbaycan həqiqətlərinin beynəlxalq auditoriyaya bir daha çatdırılması üçün əhəmiyyətli tribuna rolunu oynadı.

Prezident İlham Əliyev müsahibədə Azərbaycan dövlətinin həyata keçirdiyi siyasətin əsas dayaqlarını açıqladı. Azərbaycanın müstəqillik illərində qazandığı uğurlar, siyasi sabitlik və iqtisadi inkişaf modeli xüsusi vurğulandı. Prezident qeyd etdi ki, Azərbaycan heç bir xarici gücün təsiri altında deyil, milli maraqları əsas tutan balanslaşdırılmış siyasət yürüdür. Bu yanaşma ölkəmizin həm regionda, həm də qlobal miqyasda etibarlı tərəfdaş kimi qəbul olunmasına şərait yaradır.

Müsahibənin mühüm hissəsi Qarabağ mövzusuna həsr olundu. Prezident İlham Əliyev Ermənistanın illər boyu törətdiyi işğalçılıq siyasətindən, Azərbaycan Ordusunun 2020-ci ildə qazandığı tarixi Zəfərdən, azad olunmuş ərazilərdə aparılan genişmiqyaslı bərpa-quruculuq işlərindən bəhs etdi. Dövlət başçısı vurğuladı ki, Azərbaycanın əsas məqsədi Qarabağı yenidən dirçəltmək, onu regionun ən inkişaf etmiş bölgələrindən birinə çevirməkdir. Bu mesaj beynəlxalq ictimaiyyət üçün mühüm çağırışdır: Azərbaycan qalib ölkə kimi sülhün, inkişafın və əməkdaşlığın tərəfdarıdır.

Müsahibədə Prezident Əliyev Azərbaycanın enerji strategiyasına da toxundu. Ölkəmizin təkcə neft və qaz ixrac etməklə kifayətlənmədiyini, eyni zamanda yaşıl enerji layihələrini fəal şəkildə inkişaf etdirdiyini diqqətə çatdırdı. Azərbaycan Avropa və Asiyanın enerji təhlükəsizliyində mühüm rol oynayır və bu, ölkəmizin strateji mövqeyini daha da gücləndirir. Ərəb dünyası ilə bu sahədə əməkdaşlıq perspektivləri də müsahibədə xüsusi qeyd edildi.

Prezident İlham Əliyev “Əl-Ərəbiyyə”yə müsahibəsində təkcə regional mövzulara deyil, həm də qlobal çağırışlara münasibət bildirdi. Geosiyasi gərginliklərin artdığı bir dövrdə Azərbaycanın mövqeyi – dialoqa, əməkdaşlığa və beynəlxalq hüququn aliliyinə sadiqlikdir. Bu, həm də Azərbaycanın beynəlxalq nüfuzunu artıran əsas amillərdəndir.

Prezident İlham Əliyevin “Əl-Ərəbiyyə” telekanalına verdiyi müsahibə Azərbaycan həqiqətlərinin ərəb dünyasında və geniş beynəlxalq auditoriyada işıqlandırılmasına mühüm töhfə oldu. Bu çıxış ölkəmizin həm siyasi, həm iqtisadi, həm də mənəvi üstünlüklərini bir daha nümayiş etdirdi və bir daha bütün dünyaya səsləndi ki, Azərbaycan dövləti reqionun aparıcı gücü olaraq öz mövqeyini daha da möhkəmləndirir və beynəlxalq müstəvidə söz sahibinə çevrilir.