2025-ci il mayın 7-də Azərbaycan Respublikasının Prezidenti Cənab İlham Əliyev və Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lam arasında keçirilmiş görüşdən sonra mətbuata verilmiş bəyanat, iki ölkə arasında dostluq və əməkdaşlıq münasibətlərinin yüksək səviyyədə olduğunu bir daha nümayiş etdirdi. Bu bəyanat, həmçinin Azərbaycan diplomatiyasının Asiya istiqamətindəki strateji baxışlarını və çoxtərəfli əməkdaşlıq kursunu bir daha təsdiq etdi.

Prezident İlham Əliyevin çıxışı qarşılıqlı hörmətə, bərabərhüquqlu əməkdaşlığa və tarixi dostluğa əsaslanan Azərbaycan–Vyetnam münasibətlərinin dərin köklərə malik olduğunu göstərdi. Bəyanatda qeyd olundu ki, Azərbaycan və Vyetnamı yarım əsrdən artıq bir dövrü əhatə edən səmimi münasibətlər birləşdirir və bu əlaqələr bu gün yeni məzmunda, müasir tələblərə uyğun şəkildə inkişaf etdirilir.

Prezident İlham Əliyev bəyanatında bildirdi: “Bu gün imzalanmış sənədlər arasında Azərbaycan ilə Vyetnam arasında qəbul edilmiş Strateji Tərəfdaşlıq haqqında Birgə Bəyanatı xüsusilə qeyd etmək istərdim. Bu, çox ciddi siyasi sənəddir. Bu, əslində, Vyetnam-Azərbaycan əlaqələrini daha yüksək pilləyə qaldıran bir sənəddir. Əminəm ki, artıq bu yüksəksəviyyəli münasibətlər gələcək ikitərəfli əməkdaşlıq üçün də ən vacib rol oynayacaqdır.”

Dövlət başçısı Azərbaycanın Vyetnam ilə əməkdaşlığa xüsusi önəm verdiyini vurğulayaraq, siyasi dialoqun intensiv xarakter aldığını, beynəlxalq təşkilatlar çərçivəsində qarşılıqlı dəstək ənənəsinin formalaşdığını bildirdi. Azərbaycan ilə Vyetnam arasında BMT, Qoşulmama Hərəkatı və digər beynəlxalq platformalarda əməkdaşlığın mühüm əhəmiyyət daşıdığı diqqətə çatdırıldı.

Bəyanatda iqtisadi əlaqələrin genişləndirilməsi üçün mühüm potensialın mövcud olduğu vurğulandı. Prezident İlham Əliyev bildirdi ki, energetika, nəqliyyat, kənd təsərrüfatı, rəqəmsal texnologiyalar, təhsil və turizm sahələrində birgə layihələr üçün geniş imkanlar mövcuddur. Bu istiqamətdə hökumətlərarası mexanizmlərin və işgüzar dairələrin əməkdaşlığının gücləndirilməsi ön plana çəkildi.

Prezident İlham Əliyev, həmçinin Azərbaycanın regional təhlükəsizlik və sabitlik üçün göstərdiyi səylərdən bəhs edərək, 2020-ci ildə Qarabağ müharibəsindən sonra əldə olunan qələbənin regionda yeni reallıqlar yaratdığını və Azərbaycanın suverenliyinin tam bərpa olunduğunu qeyd etdi. Bu kontekstdə Azərbaycanın sülh təşəbbüsləri, iqtisadi inteqrasiya təşviqləri və infrastruktur layihələri barədə məlumat verildi.

Mətbuat üçün bəyanatda humanitar və mədəni əməkdaşlıq məsələləri də yer aldı. Prezident İlham Əliyev, mədəniyyətlərarası dialoqun təşviqi, elmi-təhsil mübadiləsinin genişləndirilməsi və xalqlar arasında birbaşa təmasların artırılmasının tərəflər üçün prioritet olduğunu vurğuladı.

Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lam da öz çıxışında Azərbaycan Prezidentinə səmimi qəbula və yüksək səviyyəli qarşılanmaya görə təşəkkür edərək qeyd etdi: “Hazırkı səfərim diplomatik münasibətlər qurulduqdan sonra Vyetnam Kommunist Partiyasının Baş katibinin Azərbaycana ilk səfəridir. Bu, Azərbaycanla bütün sahələrdə əməkdaşlığın bundan sonra da inkişaf etdirilməsində Vyetnamın qətiyyətli olduğunu nümayiş etdirir. Bütün bunlar, öz növbəsində, ölkələrimiz arasında ənənəvi dostluğa və əməkdaşlıq potensialına cavab verir. Biz etimad, dostluq və səmimiyyət şəraitində cənab Prezidentlə uğurlu danışıqlar apardıq və yaxın zamanlarda iki ölkə arasında əlaqələrin strateji istiqamətlər üzrə inkişaf etdirilməsi barədə razılığa gəldik. Şadıq ki, ölkələrimizin münasibətləri Prezident Ho Şi Minin Azərbaycana 1959-cu ildə səfəri ilə başladı”.  Vyetnam lideri cənab To Lamın Azərbaycana səfəri və onun yüksək səviyyədə qarşılanması, diplomatik münasibətlərə verilən önəmin, eyni zamanda Cənub-Şərqi Asiya regionu ilə Azərbaycan arasında strateji körpü rolunun təzahürüdür. Prezidentin bəyanatı bu körpünün möhkəmləndirilməsi, əməkdaşlığın institusional əsasda inkişafı və davamlı siyasi dialoqun təşviqi baxımından əhəmiyyətli mesajlar verdi.

Bütövlükdə, Prezident İlham Əliyevin 7 may 2025-ci il tarixli bəyanatı Azərbaycanın Asiya ilə tərəfdaşlıq xəttinin ardıcıl və məqsədyönlü şəkildə inkişaf etdirildiyini, ikitərəfli münasibətlərin artıq strateji səviyyəyə yüksəldiyini göstərir. Bu bəyanat həm də onu nümayiş etdirdi ki, Azərbaycan xarici siyasətdə balansı, dostluğa və əməkdaşlığa əsaslanan yanaşmanı qoruyur və dünya dövlətləri ilə münasibətləri qarşılıqlı maraqlar əsasında inkişaf etdirməkdə qərarlıdır.

Şahin Seyidzadə

Millət vəkili