Qəhvə tez enerji versə də, bu təsir həmişə uzun sürmür. Lakin kofeinin təsirini daha uzunmüddətli və orqanizm üçün daha yumşaq etmək üçün sadə bir üsul var.

Bu barədə Kuchnia.wp.pl yazır.

Qeyd olunur ki, bunun üçün qəhvəyə sadəcə bir çay qaşığı kakao əlavə etmək kifayətdir. Bu qarışım həm diqqəti artırır, həm də enerjinin daha stabil qalmasına kömək edir.

Məqaləyə əsasən, qəhvə və kakao bir-birini tamamlayır: qəhvədəki kofein sürətli stimullaşdırıcı təsir göstərir, kakao tərkibindəki teobromin isə daha yumşaq və uzunmüddətli təsir yaradır. Bu səbəbdən belə içki “enerji sıçrayışı” və ardınca gələn kəskin enişi azaldır.

Bildirilir ki, bu içkini içən insanlar diqqəti daha uzun müddət saxlaya bildiklərini və yorğunluğun daha gec yarandığını müşahidə edirlər. Kakao həmçinin maqneziumla zəngindir və bu, sinir sistemini dəstəkləyərək gərginliyi azaldır. Buna görə qəhvə-kakao qarışığı həm gümrahlıq verir, həm də stressi azaltmağa kömək edə bilər.

Qəhvə və kakao antioksidantlarla da zəngindir. Bu maddələr hüceyrələri oksidativ stressdən qoruyur və ümumi sağlam həyat tərzinə töhfə verə bilər.

Məqalədə qeyd olunur ki, bu içkinin əsas üstünlüklərindən biri beyin fəaliyyətinə təsiridir. Kofein dopamin və adrenalin ifrazını stimullaşdırır, bu da diqqəti və oyanıqlığı artırır. Kakao isə beyin qan dövranını yaxşılaşdıran təbii birləşmələrə malikdir və konsentrasiyanı gücləndirə bilər.

Praktik olaraq bu, qısa müddətli enerji partlayışı əvəzinə daha sabit stimullaşdırıcı təsir deməkdir. Bu xüsusilə zehni işlə məşğul olanlar, tələbələr və gərgin gün keçirən insanlar üçün faydalı sayılır.

Həmçinin bildirilir ki, qəhvə-kakao qarışığı bəzən güclü qəhvədən sonra yaranan əsəbilik hissini də azalda bilər.

Eyni zamanda qeyd olunur ki, inqrediyentlərin keyfiyyəti vacibdir. Ən yaxşısı şəkərsiz təbii kakao və təzə üyüdülmüş qəhvə istifadə etməkdir.

Hazırlanması bir neçə dəqiqə çəkir və içkini həm isti, həm də soyuq içmək olar.

Tərkibi:

* 1 fincan təzə dəmlənmiş qəhvə;

* 1 çay qaşığı təbii kakao;

* süd və ya bitki içkisi (istəyə görə);

* bal və ya xurma siropu (istəyə görə).

Qəhvə hazırlanır, sonra içinə kakao əlavə edilərək tam həll olunana qədər qarışdırılır. İstəyə görə süd və ya az miqdarda şirinləşdirici də əlavə oluna bilər. İçkinin səhər və ya günün ilk yarısında içilməsi tövsiyə edilir.