Türkiyənin nüfuzlu “Hürriyet” qəzetində ulu öndər Heydər Əliyev haqqında məqalə dərc olunub.

1990-cı ildə – ümummilli lider Heydər Əliyevin SSRİ-nin ovaxtı rəhbərliyinin Azərbaycanla bağlı siyasətinə etiraz etdiyi dövrdə Moskvada türk mətbuatının təmsilçisi olmuş Muammer Elverenin yazdığı məqalədə Ulu Öndərin təqiblərə məruz qaldığı illərdən bəhs edilir. Müəllif həmin vaxtlarda Ulu Öndərlə görüşdüyünü diqqətə çatdırır.

Məqalədə qeyd olunur ki, Heydər Əliyev Siyasi Büronun iclasında Mixail Qorbaçovun Azərbaycanla bağlı məsələlərə qarışmamaq tələbinə kəskin şəkildə etirazını bildirib, 1987-ci ilin oktyabrında Büro üzvlüyündən və SSRİ Nazirlər Soveti sədrinin birinci müavini vəzifəsindən istefa edib.

Muammer Elveren Heydər Əliyevin Azərbaycanda prezidentliyi dövründə də onunla görüşdüyünü oxucuların diqqətinə çatdırır.